প্রস্তৰ মূৰ্তি
(প্রতিবিপ্লৱৰ কালত)
প্রীতি শইকীয়া
ঘোঁৰাৰ পিঠিত যোদ্ধাজন টোপনিয়াই আছে
যেন যুদ্ধ কৰিবলৈ নাই কোনো প্রতিপক্ষ।
.
দুৰন্ত ভংগীত জঁপিয়াবলৈ উদ্যত টগবগীয়া ঘোঁৰাটো
এটা নিৰীহ প্রস্তৰ মূৰ্তি।
.
নিশ্চল ঘোঁৰাটোৰ পিঠিয়েদি বৈ আহে
কাউৰীৰ নগৰীয়া বিষ্ঠা।
.
তথাপিও এতিয়াও যেতিয়া ছাইৰেন বাজে
চিকমিকাই উঠে তেওঁৰ হাতৰ মুঠিৰ তৰোৱাল,
আৰু তেতিয়াই
উৎসুক পৰ্যটকৰ কেমেৰাই ক্লিক ক্লিক কৰে।
.
তেওঁৰ ডিঙিত নিতৌ এইকেইটা শব্দ ওলমি ৰয় –
মই তোমালোকৰ আছিলোঁ
মই তোমালোকৰ আছিলোঁ
.
তোমালোকতো এনেকুৱা নাছিলা !
