আইনাত, আৰ্তিৰ খুন্দাত
গৌতম প্ৰিয়ম মহন্ত
গাঢ়তাৰে ভাৰাক্ৰান্ত ৰংবোৰত মৌনতাৰ অৱৰোধ
ডাৱৰৰ শুভ্ৰতাক শুহি এলান্ধুৰ ৰং
.
বন্ধ পানীত এতিয়া নকঁপে ক’লা ছাঁবোৰ
ঘোলা স্থবিৰতাত নিদ্ৰিত ক’লা ছাঁবোৰ
.
কচাইখানাৰ ঘাঁহনিত মিহলি হয়
শুকান চকুৰ গুড়ি গুড়ি তেজ
খবৰ কাগজৰ এচুকত উৎসৱৰ নাম
(কাইলৈ কাগজ বন্ধ)
.
কোনোবাই যেন চিয়ঁৰিছে উট চৰাইৰ দৰে
গছৰ পাত নলৰে, নাভাহে যন্ত্ৰণাৰ মাত
.
নিৰুদ্দিষ্ট বতাহৰ কংকাল খেদি
দলঙৰ তলত পৰেগৈ তিনিজন আৰোহী।
