গণহত্যাৰ নিনাদ— (মূল: ছাহিদুল আলম, অনুবাদ-নৱজ্যোতি বৰগোহাঁই)

অনুবাদকৰ টোকা : পেলেষ্টাইনৰ গাজা যেন  আজি ভয়ংকৰ যন্ত্ৰণা, তুচ্ছ-তাচ্ছিল্যৰ, অৱজ্ঞাৰ এক আখ্যান। শিশুবোৰ  অনাথ হৈ পৰি আছে, সপোনবোৰ ছিন্নভিন্ন হৈ উৱলি গৈছে, অন্যায়ৰ সন্মুখত মাতৃসকল নিঃসংগ। ন্যায়ৰ দাবীত বিশ্বকণ্ঠ নিনাদিত হওক।

ছাহিদুল আলমৰ সদ্য প্ৰকাশিত Genocide’s  Claim’  নামৰ কবিতাটো, এজন আলোকচিত্ৰ শিল্পীৰ গাজাৰ গণহত্যাৰ ন্যায় বিচাৰি বিশ্বাবেদনৰ শক্তিশালী কাব্যিক অভিব্যক্তি। গাজাৰ গণহত্যাৰ প্ৰামাণ্য দলিল স্বৰূপ এই কাব্যিক প্ৰতিবেদন প্ৰতিজন বিশ্ব নাগৰিকৰ দায়িত্ববোধ। গাজাৰ সংগ্ৰামী যোদ্ধাসকলক প্ৰতিনিধিত্ব কৰি, বিশ্বৰ জনসভাত ন্যায়ৰ আহ্বান।

গাজাৰ মুক্তি সংগ্ৰামৰ প্ৰতি শ্ৰদ্ধা নিবেদন কৰি সাধ্যানুসৰি কবিতাটোৰ ভাৱানুবাদ  “মুক্ত চিন্তা”ৰ পাঠকলৈ আগবঢ়ালোঁ।

(কবিৰ চমু পৰিচয় : ১৯৫৫ চনত ঢাকাত জন্ম গ্ৰহণ কৰা কবি ছাহিদুল আলম মূলতঃ বাংলাদেশৰ এজন আলোকচিত্ৰ শিল্পী, ফটো সাংবাদিক, শিক্ষাবিদ, কবি, গল্পকাৰ, বক্তা আৰু যুঁজাৰু সমাজকৰ্মী। সমগ্ৰ বিশ্বতে এজন অন্যতম শক্তিশালী গণফটো সাংবাদিক হিচাবে খ্যাতি লাভ কৰি বিশ্বৰ বিদ্বান মহলৰ দৃষ্টি আকৰ্ষণ কৰিবলৈ সক্ষম হৈছে। বাংলাদেশৰ Drik Picture Library, Pathshala, the South Asian Media Institute, Chobi Mela International Photography Festival আদি আন্তঃৰাষ্ট্ৰীয় খ্যাতি লাভ কৰা অনুষ্ঠানৰ জন্মদাতা ছাহিদুল আলম। তেওঁ ৰচনা কৰা বিশ্বত সমাদৃত দুখন গ্ৰন্থ Nature’s Fury (2007) আৰু My Journey as a Witness (2011)।

২০০১ চনত ৰয়েল ফটোগ্ৰাফিক ছ’চাইটিৰ সন্মানীয় ফেল’শ্বিপ, ২০১৮ চনত টাইম আলোচনীৰ বছৰৰ ব্যক্তি হিচাপে নিৰ্বাচিত আৰু ২০২২ চনত লণ্ডনৰ কলা বিশ্ববিদ্যালয়ৰ পৰা সন্মানীয় ডক্টৰেট ডিগ্ৰী লাভ কৰি ছাহিদুল আলমে শ্ৰমজীৱি বাংলাদেশী ৰাইজলৈ সন্মান কঢ়িয়াই আনিছিল।

আল জাজিৰা টিভিৰ সৈতে হোৱা এক লাইভ সাক্ষাৎকাৰত বাংলাদেশৰ পথ সুৰক্ষা প্ৰতিবাদৰ প্ৰতি চৰকাৰে দিয়া হিংসাত্মক সঁহাৰিক চোকা সমালোচনা কৰাৰ কিছু সময়ৰ পাছতে আলমক ২০১৮ চনৰ ৫ আগষ্টত চৰকাৰী পুলিচে গ্ৰেপ্তাৰ কৰে। এই গ্ৰেপ্তাৰৰ প্ৰতিবাদত গোটেই বিশ্বৰ খ্যাতনামা নোবেল বিজেতা পণ্ডিত, শিল্পী, বিভিন্ন প্ৰেছ আদিয়ে চৰ্তহীনভাৱে মুক্তি দিবলৈ দাবী জনায়। শেষত বাংলাদেশ চৰকাৰে তেওঁক মুক্তি দিবলৈ বাধ্য হয়।

ইজৰাইল-পেলেষ্টাইন যুদ্ধৰ পৰিপ্ৰেক্ষিতত গাজাত যি জঘন্য গণহত্যা সংঘটিত হৈ আছে তাৰ প্ৰতিবাদ কল্পে ন্যায়ৰ দাবীত বিশ্বক সম্বোধি এক আহ্বান হিচাবে ছাহিদুল আলমৰ কবিতা ‘Genocide’s  Claim’।)

গণহত্যাৰ নিনাদ

গণহত্যাৰ নিনাদ, সত্যৰ আহ্বান।
সাক্ষ্য পৰীক্ষা কৰক, প্ৰমাণ উন্মোচন হওক।
গাজাৰ ৰাজপথত, বিভীষিকাৰ ছাঁ।
বৰ্ণবৈষম্যৰ উত্তৰাধিকাৰে দিয়া দুৰ্বহ বিষণ্ণতা।

সপোনে গঁজালি মেলা ঠাই, আজি ধ্বংসস্তুপ।
আশ্ৰয়ৰ বাবে, পানীৰ বাবে, খাদ্যৰ বাবে হাহাকাৰ।
সংঘাতৰ দাবানল, অদম্য ধুমুহা।
ভাঙি পৰা জনগণ, শোকৰ ঢল।

ইজৰাইলৰ যুদ্ধপৰাধ, ইতিহাসৰ কলংক।
যন্ত্ৰণা, অৱজ্ঞা আৰু ঘৃণাৰ আখ্যান।
অনাথ  শিশু, চূৰমাৰ সপোন।
অন্যায়ৰ আঘাতত নিঃসহায় মাতৃ নিকৰুণ।

ন্যায়ৰ দাবীত গৰজি উঠক, উচ্চ কৰক কণ্ঠ।
অত্যাচাৰীৰ বিৰুদ্ধে থিয় কৰক অদম্য মঞ্চ।
আড়ম্বৰপূৰ্ণ সভাঘৰত সিহঁতৰ বাগাড়ম্বৰ্ ভাষণ।
ঘৃণাৰ প্ৰাচীৰে ঘেৰা, গাজালৈ মনত পেলাওক।

অত্যাচাৰীক জবাবদিহি কৰক, ন্যায় হ’ব উন্মোচিত।
যন্ত্ৰণাৰ মালিতাবোৰত মমতা হ‌ওক উচ্চাৰিত।
গাজাৰ বাবে, দক্ষিণ আফ্ৰিকাৰ বাবে আৰু যত নিপীড়িত।
ন্যায়ৰ হেতু এক আহ্বান হ‌ওক, হ‌ওক সদৌ বিশ্ব সম্বোধিত।

গণহত্যাৰ বলিসকলৰ চিৎকাৰ মুকলি মনে শুনা হ‌ওক।
ইতিহাসৰ পৃষ্ঠাত অভিমতবোৰ স্পষ্ট হৈ ৰ‌ওক।।

কৃতজ্ঞতা: কবিতাটোৰ অনুবাদ কাৰ্য্যত বিভিন্ন ক্ষেত্ৰত দিহা পৰামৰ্শৰে সহযোগিতা আগবঢ়োৱা সিদ্ধাৰ্থ লাহিড়ী, দেৱজিৎ নাথ, কল্যাণী কোঁৱৰ, কমল নয়ন মিশ্ৰ, অচ্যুৎ মাধৱ দাস, ভূমিধৰ তালুকদাৰৰ ওচৰত কৃতজ্ঞ হৈ ৰ’লোঁ।