ঘৃণা আৰু প্ৰেমৰ উৎপত্তিস্থল ক’ত? ।। মূল : ওম প্ৰকাশ বাল্মিকী : অনুবাদ: মুনমুন সৰকাৰ
মুক্ত চিন্তা। একাদশ বছৰ।। ৪ৰ্থ সংখ্যা
মনত পেলোৱা সেই মাতৃৰ মুখখনলৈ
যাৰ পুত্ৰক ৰাস্তা লৈ উলিয়াই সকলোৰে আগত
পিটা হৈছিল
নিৰ্মমতাৰে
যিজন ল’ৰাই বন্ধুত্ব কৰিব খুজিছিল
বনৰীয়া ফুল
আৰু বৈ থকা নদীৰ স’তে
মনত পেলোৱা
সেই পুত্রৰ মুখখনলৈ
যাৰ মুখৰ আগত পেলাই থৈ গৈছিলা
বখলিয়াই চিৰাচিৰ কৰা
তাৰ মাকৰ গাৰ কাপোৰ
মনত পেলোৱা
সেই বৃদ্ধ পিতৃৰ মুখখনলৈ
যিজনে কঠোৰ পৰিশ্ৰমেৰে
দিনে ৰাতি তোমাৰ আধি লোৱা
পথাৰ সিঁচিছিল
ফচল কাটিছিল
তোমাৰ চোতাল ঘৰ সাৰি মচি ৰাখিছিল
যাৰ কঠোৰ পৰিশ্ৰমৰ পৰিৱৰ্তে
উপহাৰ হিচাপে দিয়া হৈছিল
অশ্ৰাৱ্য গালি আৰু কৰা হৈছিল তিৰষ্কাৰ,
যিজনৰ গাভৰু ছোৱালীজনীৰ শৰীৰত ওপৰত
জাক জাক শগুণৰ চকু
পৰিবলৈ লৈছিল লাহে লাহে
মনত পেলোৱা সেই পিতৃৰ মুখখনলৈ
মনত পেলোৱা
সেই চৰকাৰী তৃতীয় বৰ্গৰ কৰ্মচাৰীৰ মুখখনলৈ
যাক এটুপি পানী যচা কামটোও এৰাই চলে
একেই অফিচৰ চতুর্থ বৰ্গৰ কৰ্মচাৰীজনে
এই সকলোবোৰ ঘটনাৰ পিছতো
তোমাৰ জানিবলৈ মন নাযায় নে
ঘৃণা আৰু প্ৰেমৰ উৎপত্তিস্থল দৰাচলতে ক’ত?
